Pro Ref Ҳоланднинг голи ҳисобга олиниши VAR хатоси сабаб бўлганини тан олди ва «Манчестер Юнайтед»дан узр сўради.
Фото: Reuters
Англия: «МЮ» бир киши кўп бўлиб ўйнаб ютқазди
«Манчестер Юнайтед» – «Манчестер Сити» 0:1
Гол: Ҳоланд, 60 (0:1)
«Манчестер Юнайтед»: Ламменс, Магуайр, Мартинес, Доргу, Далот, Тилеманс (Шешко, 67), Майну, Бруну Фернандеш, Рэшфорд (Зиркзе, 83), Мбемо, Куня
«Манчестер Сити»: Доннарумма, Рубен Диаш, Гейи, Гвардиол, Матеуш Нунеш, Андерсон, Фернандес (О`Райли, 82), Шерки (Ндиай, 46), Семенё, Фоден, Ҳоланд
Огоҳлантиришлар: Магуайр, 81 – Гвардиол, 79. Фернандес, 80
Четлатиш: Фоден, 23
Ҳусанов қаторасига иккинчи ўйинда захирада қолди – Мареска ўнг қанот ҳимоясида Матеуш Нунешга ишонч билдиришда давом этмоқда. Кэррик эса чап қанотда жароҳат олган Шоу ўрнига Доргуни туширди.
Манчестер дербисининг биринчи бўлими хавфли вазиятларга бой бўлмади – энг ёдда қоларли вазият дарвозага ҳужум билан эмас, рақибларнинг бир-бирига ҳужуми билан боғлиқ эди. Биринчи бўлим ўрталарида ўйиндаги сокинликни Бруно Фернандеш ва Фоден иштирокидаги тўқнашув бузди.
23-дақиқада Бруно ён чизиқ олдида тўпни Фодендан олиб қўйишга уриниб, уни тепиб йиқитди. У газонда ётган рақибнинг бел соҳасига ҳам оёғи билан зарба берди.
Фоден эса бунга чидай олмасдан ётган ҳолда Брунонинг қорнига зарба берди, ўйин бош ҳаками Майкл Оливер португалиялик яримҳимоячининг ҳаракатини эътиборсиз қолдириб, фақат англиялик футболчини жазолади – тўғридан тўғри қизил.
Сон жиҳатдан кўпчилик бўлиб қолганидан кейин ҳам «МЮ» кўп вазият яратмади, биринчи бўлимдаги дарвоза соҳасига борган ягона тўғри зарба 7-дақиқада Лисандро Мартинеснинг тўғри Доннарумманинг қўлига бориб тушган зарбаси бўлди. Шунингдек, бўлим охирида Рэшфорднинг, иккинчи бўлим бошида эса Майнунинг зарбаларидан кейин тўп устунга тегди. Бу вазиятлардан кейин «МЮ» сон жиҳатдан устунликдан фойдаланиб, рақибни босиб ташлаши кутилганди, аммо бундай бўлмади.
60-дақиқада яна бир можароли эпизод рўй берди. Гвардиол қанотдан узатма берди, олис устун яқинида турган Ҳоланд тўпни бир тегинишда дарвоза тўрига жойлади. Аввалига майдондаги ҳакамлар норвегиялик ҳужумчини офсайдда деб топиб, голни бекор қилди. Аммо вазиятга VAR аралашиб, Ҳоланд тўғри ҳолатда бўлганини маълум қилди ва гол инобатга олинди.
Бу гол ўйин тақдирини ҳал қилди, меҳмонлар озчилик бўлиб ўйнаганига қарамай, ғалабали ҳисобни ушлаб қолишди. 90+5-дақиқада «МЮ» ўйиндаги энг яхши вазиятига эга бўлганди, Бруно Фернандеш Мбеумони дарвозабон билан яккама-якка вазиятга чиқариб юборди, аммо Доннарумма ўз жамоасини қутқарди.
Ўйиндан кейин эса ҳакамларнинг голни инобатга олиш қарори муҳокамалар марказига чиқди. Гап шундаки, голли ҳужумда иштирок этган Энцо Фернандес пассив офсайд ҳолатида эди – у тўп учун ўйнаган ва рақиб ҳимоячиси Мартинесни чалғитганди.
Pro Ref (АПЛда ҳакамлик учун жавоб берувчи ташкилот) тан олди: аргентиналик футболчи тўпга ета олмаган бўлса-да, у барибир вазиятга таъсир кўрсатган. Шунинг учун Ҳоланднинг голи ҳисобланмаслиги керак эди.
Ташкилот ушбу ҳолатда жабрланувчи томон бўлган «Манчестер Юнайтед»дан узр сўралганини маълум қилган.
«Майдондаги ҳакам офсайд қайд этди. Бу эпизод видеоҳакам томонидан текширилди ва Ҳоланд тўғри ҳолатда экани аниқланди.
Худди шу ҳужум давомида Энцо Фернандес тўпга тегмагани аниқланди. Шу сабабли унинг офсайд ҳолатида бўлиши автоматик равишда қоидабузарлик ҳисобланмайди ва бундай вазиятни баҳолаш субъектив характерга эга.
Бироқ, ушбу ҳолатда видеоҳакам Фернандес ҳолатининг эпизодга эҳтимолий таъсирини тўғри баҳоламаган – у ҳакамни такрорни кўриш учун монитор қаршисига чақириши керак эди.
Бугун кечқурун биз «Манчестер Юнайтед» билан боғландик ва буни эпизодни баҳолашда хато деб ҳисоблашимизни тан олдик. Вазият қўшимча равишда кўриб чиқилади», – дейилади Pro Ref баёнотида.
Видеони очиш
Испания: Ямал ва Рафиня Месси графигида кетмоқда
«Леванте» – «Барселона» 2:4
Голлар: Эспарт, 5 (0:1). Ямал, 19 (0:2). Ямал, 48 - пеналти (0:3). Ромеро, 79 (1:3). Бруге, 88 (2:3). Адейеми, 90+3 (2:4)
«Леванте»: Райан, Манди, де ла Фуэнте (Перес, 71), Санчес (Ндукве, 71), Толян, Сотело (Рей, 60), Оласагасти (Бардели, 59), Бруге, В. Гарсия, Рекена, Ратков (Ромеро, 60)
«Барселона»: Х. Гарсия, Кубарси, Мартин (Кристенсен, 46), Эспарт (Жоау Канселу, 80), Э. Гарсия, Родри, Педри (Олмо, 66), Фермин Лопес, Гордон (Адейеми, 67), Ямал (Бернал, 66), Рафиня
Огоҳлантиришлар: Сотело, 45 – Мартин, 45
«Барселона»нинг навбатдаги ўйинида ҳам голлар шоуси уюштирилди. Каталонияликларнинг бу мавсумдаги асосий кашфиёти бўлган 19 ёшли ҳимоячи Хави Эспарт узоқ масофадан аниқ зарба бериб, ла лигадаги голлари ҳисобини очди. Эспарт энди кўк-анорранглиларнинг XXI асрда Испания чемпионатида гол урган энг ёш ҳимоячисига айланди.
Кўп ўтмай Рафиня қарши ҳужумда тўп учун охиригача курашди ва дарвозабонни ҳам алдаб ўтиб, Ямални деярли бўш дарвоза қаршисига чиқарди – 2:0. Бразилиялик ҳужумчи бу мавсумда 5 турдаги голли ҳаракатлари сонини 9 тага етказиб (6+3), бу борада Мессининг натижасини такрорлади. Ямал ҳам Леонинг графиги бўйича кетмоқда. У танаффусдан кейин ўзи ишлаган пеналтини аниқ ижро этиб, мавсум тўпурарлари пойгасида Рафиня, Мбаппе ва Камелиога етиб олди (6 тадан гол): Ламин бу орқали 2012/13 йиллар мавсумида дастлабки беш турда уч марта дубл қайд этган аргентиналик афсонанинг натижасини такрорлади.
Ҳисоб йириклашгач, кўпчилик «Леванте» ҳам «Барса»нинг олдинги рақиблари каби яна иккита гол ўтказишини кута бошлади. Аммо валенсияликлар таслим бўлишмади ва ўйин охирига бориб, ҳисобни минимумгача қисқартиришди. Меҳмонлар жамоаси мухлислари хавотирга тушиб қолишганди, аммо қўшимча дақиқаларда Адейеми ўйинга нуқта қўйди – 2:4. Ҳанси Флик шогирдлари юз фоизлик натижа билан биринчи ўринда боришда давом этмоқда.
Видеони очиш
«Реал Соседад» – «Атлетико» 0:3
Голлар: Грималдо, 84 – пеналти (0:1). Дэвид, 90 (0:2). Симеоне, 90+5 (0:3)
«Реал Соседад»: Ремиро, Сарр, Бейтия, Гомес, Арамбуру, Солер (Горротчатеги, 78), Эррера (Захарян, 85), Сучич, Гонсалу Гедеш (Кубо, 72), Барренечеа (Очинг, 72), Ойярсабал (Оскарссон, 79)
«Атлетико»: Облак, Ромеро, Ганцко, Пубил, Лиоренте (Коке, 60), Юлманд, Грималдо, Симеоне, Ли Кан Ин (Дэвид, 60), Баэна (Кардозо, 59), Лукман (Ортис, 76)
Огоҳлантиришлар: Эррера, 18. Ойярсабал, 78 – Кардозо, 75
Руҳий муаммолардан халос бўлган ва ЕЧЛда «Ливерпул»га қарши яхши ўйин намойиш этган Ҳулиан Алварес «Атлетико» билан Сан-Себастянга сафар қилмади. Аммо бу мураббийнинг қарори эмасди – футболчи кичик жароҳат олгани маълум бўлган.
Соф ҳужумчисиз ўйнашига тўғри келган Диего Симеоне жамоаси «Аноэте»даги ўйинда анча вақтгача гол ура олмади. Ўйин тақдирини 84-дақиқада мезбонлар ҳимоячиси жарима майдони ичида тўпни қўл билан ўйнаши ҳал қилди. Белгиланган пеналтини Грималдо аниқ ижро этди. Қўшимча дақиқаларда у Дэвидга голли узатма ҳам берди, кейин эса қарши ҳужумда ҳимоячилардан қочиб кетган Жулиано Симеоне ўйинга сўнгги нуқтани қўйди.
Видеони очиш
