Республикачилар қарийб 100 йил мобайнида сенаторлик ўрни эгаллаб турилган Канзасда ҳам ютқазишди.
3 ноябр куни АҚШда конгресс учун оралиқ сайловлар бўлиб ўтди. Америкаликлар вакиллар палатасининг янги таркиби (конгресс қуйи палатасида 435 ўрин), сенат аъзоларининг учдан бир қисмини (конгресс юқори палатасида 35 ўрин), шунингдек, 36 штат губернаторлари ва маҳаллий қонунчилик йиғилишлари депутатларини сайлашди. Оралиқ сайловлар президентлик муддатининг ярмида бўлиб ўтади ва сайловчилар ҳамда ОАВ томонидан амалдаги давлат раҳбарига ишонч билдириш бўйича ўзига хос референдум сифатида қабул қилинади. Қоидага кўра, бундай сайловда ҳукмрон партия доим ютқазган. Бу сафар ҳам шундай бўлди. Доналд Трамп бошқарувидаги Республикачилар партияси вакиллар палатасида ҳам, сенатда ҳам кўпчилик ўринни бой берди.
Демократик партия 3 ноябр кунги оралиқ сайлов якунларига кўра АҚШ конгрессининг ҳар икки палатаси устидан назоратни қўлга киритди. NBC News телеканали прогнозларига кўра, демократлар вакиллар палатасида 255 ўрин (республикачиларда 180), сенатда эса – 48 га қарши 52 ўрин олади. The New York Times нашри эса Демократик партия вакиллар палатасида 256, сенатда 55 ўрин қўлга киритишини прогноз қилган. Bloomberg агентлиги ҳисоб-китобларига кўра, демократлар сенатда 53, вакиллар палатасида 227 ўринни кафолатлаган. CNN ва Reuters ҳам тахминан шундай натижаларни тахмин қилган. Якуний ҳисоб-китоблар эълон қилиниши бир неча ҳафта вақт олиши мумкин.
Демократлар азалдан республикачилар таянчи ҳисобланган ва Трамп мунтазам равишда ғалаба қозониб келган штатларда ҳам сенаторлик креслосини эгаллади.
Мэн. Демократ Трой Жексон республикачи Сюзан Коллинзни мағлуб этди, у сўнгги 30 йил мобайнида ушбу штатдан сенаторликка сайланиб келганди.
Техас. Демократ Жеймс Таларико штат бош прокурори, республикачи номзод Кен Пакстонни мағлубиятга учратди. Техасдаги сайлов кампанияси миллий миқёсда энг қимматбаҳоларидан бири бўлганди. Пакстон қатор можароларга аралашиб қолганди, аммо шахсан Трамп уни қизғин қўллаб-қувватлади. Техас сўнгги 30 йилдан ортиқ вақт мобайнида «республикачиларники» бўлиб турганди.
Канзас. Адам Ҳэмилтон Рожер Маршаллни мағлуб этди ва қарийб 100 йил ичида – 1932 йилдан буён штатдан сенаторликка сайланган илк демократ бўлди.
Nathan Howard / Reuters / Scanpix / LETA
Демократ Адам Ҳэмилтон Канзасда бўлиб ўтган сайловлардаги ғалабани нишонламоқда, 2026 йил 3 ноябр
Шимолий Каролина. Собиқ губернатор Рой Купер сенаторлик ўрни учун курашда Майкл Уотлидан устун келди – сенаторлик ўрни республикачи Том Тиллис пенсияга чиқиши муносабати билан бўш қолганди.
Жанубий Каролина. Демократик партия вакили Энни Эндрюс сенатор Дарлин Грэм устидан ғалаба қозонди (у бу лавозимни ўз акаси, машҳур республикачи Линдси Грэм вафотидан кейин эгаллаганди). Демократлар 1998 йилдан мазкур штатдан сенатга сайланмаётганди.
Win McNamee / Getty Images / AFP / Scanpix / LETA
Демократик партия вакили Энни Эндрюс оралиқ сайловлардаги ғалабани нишонламоқда. У Жанубий Каролинадан сенаторликка сайланди. 2026 йил 3 ноябр
Айова. Демократ Жош Турек ушбу штатдан сенаторлик учун курашда республикачи Эшли Ҳинсонни мағлубиятга учратди, Трамп мазкур штатдаги сўнгги уч сайловда ҳам ғолиб бўлганди.
Оҳайо. Демократ Шеррод Браун республикачи Жон Ҳастед билан бўлган курашда штатдан сенаторлик курсини қайтариб олди.
Вакиллар палатасида эса Демократик партия вакиллари Айова, Техас, Флорида ва Пенсилванияда бир неча қўшимча ўринларни, шунингдек, Кентукки, Миссури, Небраска, Оҳайо ва Ютада янги ўринларни қўлга киритди.
Конгресснинг юқори палатасида илк мусулмон сенатор пайдо бўлди. Бу Мичигандан сайланган 42 ёшли демократ номзод Абдул Ас-Сайид. У сайлов кампанияси даврида нафақат тўғридан тўғри рақобатчиси, республикачи Майк Рожерсга қарши, балки, Демократик партиянинг бошқа бир номзоди, праймеризда мағлуб этилган Ҳейли Стивенсга қарши ҳам курашишига тўғри келди. Сайловлар арафасида Стивенс кутилмаганда партиядошини қўллашни тўхтатиб, Рожерс фойдасига чиқишлар қилганди. Ас-Сайид – Исроилнинг ошкора танқидчисидир. Стивенснинг демарши мўътадил демократлар ва Ас-Сайиднинг позициясини қабул қила олмайдиган яҳудий миллатига мансуб сайловчилар кайфиятини акс эттириш сифатида қабул қилинди.
Brian Snyder / Reuters / Scanpix / LETA
Абдул Ас-Сайид оралиқ сайлов якунларидан кейин журналистлар ва ўз тарафдорларига мурожаат қилмоқда
Демократлар штатлар губернаторлиги учун сайловларда ҳам ишончли ва муҳим ғалабаларга эришди. Улар Пенсилвания (Жош Шапиро), Иллинойс (Жей Би Прицкер), Мэриленд (Уэс Мур), Массачусетс (Маура Ҳили) ва Ню-Йоркда (Кэти Ҳочул) қайта сайланишди.
Жоржия. Демократик партия вакили Кейша Лэнс Боттомс АҚШ тарихида губернаторлик лавозимига сайланган илк қора танли аёлга айланди.
Megan Varner / Getty Images
Кейша Лэнс Боттомс натижалар эълон қилинишини ўз яқинлари ва тарафдорлари билан шундай қарши олди, 2026 йил 3 ноябр
Техас. Бу штатда эса демократ Жина Ҳиноҳос келиб чиқишига кўра лотин америкалик бўлган илк губернатор бўлди. У бунгача қаторасига уч марта қайта сайланган республикачи Грег Эбботтни мағлубиятга учратишга эришди.
Ню-Мехико. Демократ Деб Ҳолланн эса мазкур штат тарихида губернаторликка сайланган илк туб аҳоли вакили. Ҳолланн хоним ҳиндуларнинг пуэбло қабиласига мансуб ҳисобланади. Аввалроқ у конгрессга сайланган илк туб аҳоли вакили ва АҚШ ҳукумати вазири лавозимидаги илк туб аҳоли вакили сифатида тарихга кирганди.
Sam Wasson / Getty Images
Деб Холланн ўз тарафдорларига мурожаат қилмоқда, 2026 йил 3 ноябр
Оҳайо. Доктор Эми Эктон мазкур штат губернаторлигига сайланган илк аёл бўлди. Ковид пандемияси даврида у Оҳайонинг бош санитар шифокори лавозимини эгаллаганди. Сайловолди кампанияси вақтида у билан боғлиқ можаро келиб чиқди. Унинг республикачи рақиби Вивек Рамасвами Эктон хонимнинг онаси иштирокида реклама ролиги эълон қилди, унда аёл қизи ўзининг ҳолидан хабар олмаслигидан шикоят қилганди. Лекин маълум бўлишича, Эми Эктон болалигида ўгай отаси томонидан жинсий зўравонликка учраган, шундан кейин она оналик ҳуқуқидан маҳрум қилинган ва болалар ҳақиқий отасига олиб берилган. Рамасвами бу ролик учун ўз тарафдорлари томонидан ҳам қаттиқ танқидга учради.
Миннесота. Бу штатда ҳам илк бор аёл киши губернаторликка сайланди. Демократик партиядан сенатор бўлган Эми Клобучар губернаторлик учун курашда ушбу штат вакиллар палатаси спикери Лиза Демутни мағлуб этди.
Dymanh Chhoun / Sahan Journal / Catchlight via Getty Images
Миннесотадан сайланган губернатор Эми Клобучар, 2026 йил 3 ноябр
Калифорния. Ҳавиер Бесерра штатнинг келиб чиқишига кўра лотин америкасилик бўлган илк губернатори этиб сайланди. Илгари у Калифорния бош прокурори, конгресс аъзоси бўлган, шунингдек, Жо Байден маъмурияти даврида АҚШ соғлиқни сақлаш вазири лавозимини эгаллаган.
Трамп Республикачилар партиясининг сайловлардаги мағлубиятини қабул қилишга «мутлақо тайёрлиги»ни айтди. Президент The New York Times билан суҳбатда демократлар билан ҳамкорлик қилишга тайёрлигини билдирган. «Биз нимадир ўйлаб топишимиз мумкин», – дея қўшимча қилган у. Fox News телеканалига берган изоҳида эса Трамп натижалардан «бироз ҳайратга тушгани», чунки республикачилар «яхшироқ қатнашади» деб ўйлагани ҳақида гапирган. Президент республикачилар мағлубиятини сайлов бюллетенларида ўзининг номи бўлмагани билан изоҳлади.
Сўровларда прогноз қилинганидек, оралиқ сайловлар америкаликлар Трампнинг сиёсатидан иқтисодий масалаларда ҳам, Эрон билан уруш очгани учун ҳам норози эканини намойиш этди. Сайловлар арафасида президент рейтинги минимал даражагача тушганди – Трампнинг фаолияти АҚШ фуқароларининг фақат 35-37 фоизи томонидан маъқулланган.
Reuters агентлиги олдинроқ Оқ уй бир неча ойдан бери Трамп учун конгресс устидан назорат демократларга ўтадиган вазиятдаги бошқарув стратегиясини ишлаб чиқаётгани ҳақида ёзганди. Хусусан, Оқ уйдагилар президент сиёсатнинг қайси устувор йўналишларини конгрессменларнинг розилигисиз амалга ошириши мумкинлигини ўрганишган. Трампнинг ўзи эса «Мистер Вето» бўлиши, яъни демократлар ташаббуси билан чиқарилган қонунларни имзоламаслигини маълум қилди.
